Кәсіпкерлік саласындағы міндеттемелік құқық түсінігі, пайда болу негіздері және орындалу қағидалары

    Міндеттемені  орындау мерзімі заңмен, міндеттеменің  пайда болу негізімен немесе  оның мәнімен анықталады. Міндеттемелер  орындалу мерзімі анықталған  міндеттемелер және орындалу  мерзімі талап етілетін кезбен  белгіленген болып бөлінеді.

    Егер міндеттемеде  ол орындалатын күн немесе  ол орындалуға тиісті уақыт  кезеңі көзделсе немесе анықтауға мүмкіндік берсе, онда мұндай міндеттемелер орындалу мерзімі анықталған міндеттемелерге жатады.

    Мұндай міндеттеме  міндеттемеде көзделген сол күні  немесе тиісінше сол кезең ішінде кез келген уақытта орындалуға тиіс.

    Міндеттемеде  ол орындалатын мерзім көзделмесе  және ол мерзімді анықтауға  мүмкіндік беретін шарттар болмаса, ол міндеттеме пайда болғаннан кейін ақылға қонымды мерзімде орындалуға тиіс.

    Орындалу мерзім  туралы шарттар көзделмеген міндеттемелер,  несие беруші оның орындалуын  талап еткен күннен бастап  жеті күн мерзімге орындауға  міндетті.

    Белгіленген мерзімде  міндеттемені орындамаған жағдайда  міндеттеменің бұзылуы пайда  болады, оны мерзімнің өткізілуі  деп атайды. Мерзімді өткізіп  алуды борышкер де, несие берушіде  жасауы мүмкін. Борышкердің мерзімді  өткізіп алуы, яғни міндеттемені  белгіленген мерзімде орындамауы, ол борышкерге мерзімді өткізіп  алуына байланысты несие берушіге  келтірілген шығынды өтеу міндеттілігін  жүктейді.

    Міндеттемені  орындау айып төлету, кепіл, аманат, кепілдік, кепілпұлмен, сондай-ақ  Қазақстан Республикасының заңнамасымен  көзделген өзге де әдістермен  қамтамасыз етіледі.